Қалай ұйықтаған денсаулыққа пайдалы?
Қытай медицинасында адамның бір қырымен жатып ұйықтағанының пайдасы мол екендігі айтылады. Сол жақ «иығынан жату асқорыту үдерісін жақсарта түссе оң жақ қырымен жату жүйке жүйесін босаңсытса керек. Кейде «етбетіңнен жатпа бетіңді жоғары қаратып ұйықтама» дегендерді де жиі естіп жатамыз. Бірақ бүгінде мамандар бұл пікірмен келіспейді.
Мамандардың айтуынша, шалқасынан жатудың пайдасы айтарлықтай. Мойын мен бел еркін жатып, аяқ пен қол демалып қалады және де ол жүрек тамырларын тыныс алу жүйесін, ас қорытуды дұрыстайды екен. Ал қан қысымы жоғары адамдарға жастықты биік қойып, шалқасынан жатып ұйықтаудың көмегі тиеді. Сонымен қатар шалқасынан жату жас көрінуде де үлкен рөлге ие. Шалқадан жатып ұйықтаған адамның беттегі бұлшық еттері босаңсып, терісі жазылады. Ал етбетінен жатсаңыз, бетке тез әжім түсуі мүмкін. Десе де етбетінен жатқанда, омыртқа аралығындағы шеміршек босаңсиды. Бұлай жату тек қарны аш кезде ғана пайдалы. Тойып тамақ жеп болған соң етбетінен ұйықтау гастритке ұшыратады.
Қырынан жатқан адам қорылдамайды екен. Сол жақ қырымен ұйықтау өкпесі ауыратындар үшін пайдалы. Асқазаны ауыратындар да сол жақпен ұйықтағаны дұрыс, себебі осылайша қызыл өңешке ағып кіретін қышқыл сөлін азайтуға болады. Ал созылмалы ішек қабыну ауруы бар адамдар оң қырымен жатуы керек және оң жақ қырымен жатып ұйықтағанда, жүрекке түсетін қысым жеңілдейді.
